kumulis nu i Siwkulanay a Pangcah

ngatu cacay

kumulis nu i Siwkulanay a Pangcah u kumulis hananay i, u laluwaden nu niyazu’ tu mihecahecaan. luma, satukeled han nu cacay a naniyazu’an a ciluwad. Luma, malaladub ku pinapina a niyazu’ a malacacay ku luwad. i ka’ayaw nu ilisin saca a ciluwad tu kumulis. cacay a luwad, anu lanikay i, tusa ku demiad cacay ku dadaya. anu mangayal i, tusa ku dadaya tulu ku demiad. u tata’ang nu nanum ku pialawan tu saka lanikay atu saka ngayal nu luwad.

ngatu tusa

u kaciluwadan tu kumulis i, u Siwkulan a talawadaw. u kawaw a kumulis i, taba’en ku sawa’elan nu kacacinuwasan a pasayla i luma a sunul nu nanum. ta i tiya yu makelah tu ku nanum a mibuting. u lalusimeten tu sipitaba’ i, u kilang malutaltal, u eli’ atu talud, u tabayal, u bukeluh, atu bunak atu si’elac, hatila. yu miteka a mitaba’ tu nanum i, cacay ku suwal nu mama nu kapah, sabelibelih satu ku sabasaba a kapah pakinacacay tu tayal a mitaba’, awaay ku matayuay. u saka saan a pakinacacay tu tayal i, nga’ay caay kasalucud ku nanum a misetul tu sataba’ u sanay. naw hani, anu masalucud hu ku nanum a mipelux tu taba’ i, caay tu ku mamabilu ku nanum a liyawen a mitaba’. yuzasaka, sataliktiken ku kawaw a mahmin.

ngatu tulu

Sasitahebud satu ku nalikulan nu kapah a cumikay. u kahemekan a minengneng ku kabalihbih nu kapah a mitaba’. u taluma nai pala anu mahelek ku pibuting, maedeng kami a minukay anu dabak i anu saan ku piditek nu mama nu kapah tu luwad naila i, uculen nu mama nu kapah ku sadusidus nu ciupihay a selal. patakec han naila ku cuhcuh i laenu nu cuhu’ i sabaled nu ’amatulud naila. itiya i kasademseman nu buti’ tu dadaya, na’un saan caila a cumikay a mitaliyuk tu niyazu’ a palatuh tu i luma'ay. kamu saan：“ uy! ina! tekung ’alaway, ’alilawlaw nu bulad, keliw sasebet, minukay kami anu dabak” saan a palatuh tu i luma’ay. pakatengil ku i luma’ay tu pipalatuh nu kapah i, malatal a manikal ku babahiyan a misahakhak tu sasatulunen.

ngatu sepat

ta sa’apeladen naila ku tulun a misapangkiw nu kawat ku pisakubetul, cacay a kamat ku nika pisadadahal. ta pataylaen naiza i ’adawang a patulud i teluc nu lubang kuya tulun i mamalahuk . ta silimlimen nu pakalungay nu lubang a mipili’ ku bangcalay, u sakaay ku nini, u sasaba'ay ku nini a apelad saan a misiwatid. yaan yu sabangcalay i, u malusapaka'en tu matu'asay saan ku pisakilac nu sasaba'ay a lubang. anu minukay satu ku kapah i, tangsul han nu mama nu kapah ku buting a misakilac.tata’akay a buting i, malu nu kalas a kilac; mimingay a buting i, u sapakilac tu teluc. matizaay ku pisakilac nu Pangcah a masaseleselel. uusaw a misakilac a buting i, malusakalahuk tu nu binawlan i ’adawang. u kumulis hananay i, tudungay u sapalatamdaw tu kapah atu teluteluc a mingudu tu matu’asay, atu sakabana’ nu misina’el tu niyazu’.

namakayniay a nasulitan nasakamuan atu natinengan

namakay sulitan ni Wumingyi u Pangcah a sasaydang