kungku- litapangan a milingayaw

kungku- litapangan a milingayaw

ngatu cacay

matiniay ku litapangan nu pingayaw, yu mikelid tu tatusaay a wawa ci Yitungan atu ci Damayan a mikasuy ci Calaw, masu’aw tu ci Calaw, ucul han niza kuya malakakaay a tatusa tayza i sawaelan a midadum, nika u sapalimu’utang tuya tatusaay a malekaka kuya ci Calaw, palingata sa ciniza mikiayaw minguta tuya nanum, minukay kuya tatusaay awawa kamu sa, “mamaaw! manguta kuya nanum, saka mausuy kami a minukay.” pacaup han ni Calaw a sakamu, “Cadiwen ku pu’ut atu ’iduc namu, samada han a mizawud tayza tuya sawaelan nu nanum, nengnengen cima kuya tatiihay a tademaw mingutaay tu nanum, ma’alaw namu tepuc han ku bunguh niza.” uya tu malekakaay paliyaw tu a tayza.

ngatu tusa

tunini, makela tu niza tatusa izaw itiza minguta tu nanum nu sawa’elan, uzasa samadah sa a mizawud mingata tuya tati’ihay a tademaw, kawilikawanan ku cacay kitatusa han niza a micucuk ta mapatay, inayi’ tu ku lawat nuya tademaw a pacu’ay, tepuc han tu nuza malekakaay ku bunguh, nengneng han niza pacekuk u mama niza kuya mitepucan!

ngatu tulu

muwangic satu ciniza a minukay pakabana’ tu ina tuna litapangan a kawaw, tangsul tu mikaketel cinizanan tatusa kamu sa “pingayaw tu bunguh han nu mama namu, wata ku ulah namu a mingayaw, u bunguh tu nu mama namu tepucen tu, a matizaw aca uli pi’adup mingayaw tu bunguh! ” uzasa mingayaw tu tu bunguh ciniza malekaka, lima a demiad caka kumaen tu kakaenen, mahelek tu talatapulu palukelun tu bukeluh, mitanam milibet tu cikay nu bukeluh, nika caka pihalakat tu bueluh, uzasa cahu kaedeng a mingayaw tu bunguh sa ciniza. caay pitulas ciniza a misalibelibet a minanam misaliway tu kakaenen, malecad hu ku pilibet niza tu kalekelun nu bukeluh, tuni pilibet maluwid tu niza, kamu satu, “izaw tu ku ’icel niyam, haydaen kami misanga’ tu sabang.” tabu han niza malekaka ku bukeluh, mangaay sapipaekel tu ’ada a sabang, mangaay aca sapilepet tu malunem, u izang nu malunem palu han tacebuan nu malunem.

ngatu sepat

masadak ciniza tayza i niyazu’ nu ’ada, i laawac nu niyazu’ mikuwan pasuni, mikaduh tu ’ada hay masadak a mibulaw, nika pakaazih ku ada cinizanan tatusa aca a malekaka, salahuday sa misatapang tu a mizawup. tangsul tu mizawliw kuya malekakaay, cumkay ciniza pasiyasi’en niza kuya mipaluan i tacebuan a izang, matu ciduka haysa, mahelek tu tayza tu tuya malumutay i saluakung tuya mica’itan a sabang, hamin hantu kuya izang miseni’ i sabang, minengneng kuya ’ada tuya pinatela’ a izang, ketun hantu kuya keliw nu sabang, u sabang atu bukeluh malukelun tu maemin mapaekel tu ku ada a tademaw, itiya tu sa lahuday sa ciniza malekaka hacecacacay hantu niza a mitepuc ku bunguh. u bukeluh ku tadek nu kaka a miketun, uzasaka kinacacay miketun ceca ku ngici’ nu pu’ut; nu saba han u kizawng ku tadek a pitepuc, uzasaka caay katalec caay kangici’ halakat ku pitepuc niza.

ngatu lima

u sapanukayaw aca tuza bunguh nu ada, ala sa tu talupu a kizawng malu’unuc niza, nika kuengel ku caang, cahucahu mapitek tu, nika nu saba han na pakatengizawy tu suni nu ayam kamu sa, “taciwlalaw, taciwlalaw ” saan saka ala sa cingla tu taciwlalaw a kizawng malu’unuc niza, uzasaka caayay ka pitek. lata’ang sa ciniza a minukay pabeli han niza ku ina tuya bunguh nu ada, nika caay ka lipahak kamu sa, “sapimaan ku bunguh nu tademaw, ma’usi kaku tu matiniay a lalusidan.” uzasa malekakaay kamu sa, “naw hatizaw tu ku ketel ni ina? liyas satu kita tu luma’ mikilim tu malulamud satu!”

ngatu enem

tahizaw ciniza tuya cacay a pala, mipecu’ ciniza tu mami’. kamu sa ku kakak, “nu makuay a mami’ ku maluhemay itiniay ” ala sa tu cacay pudac han niza izaw ku matu’asay tu a babahiyan, malihaw ku ngiha. nu saba han kandaway hu, pudac han niza, masadak ku limecedan hu a babahiyan.

ngatu pitu

hakelungen tu niza malekaka ku babahi minukay, makela izaw tu ku baluhay kaulahan nu ina niza ma’usi cinizanan, uzasa u lalum nu balucu’ niza malekaka sakabung tu sapikpik nu ’ayam mihawikid tu cibu’isay tu tilid a pu’ut pakamu tu ina, “inaaw, anu matizawtizaw ka la’etu ku balucu’ isu, nengnengen hu isu kami itini i putal! ikul tu edeng tu kabangcalan ku demiad tu dadaya, ta mangaay nu misu minengneng tamiyanan.” uzasa hatusa tu wa’ay takud han niza, “Peng” sa cacay ku suni, milipa’ tu suta’ ku wa’ay, masuni hu, micumud tu ku pakih talalinik nu suta’, sakinatulu masuni, u wa’ay maemin tu malabung i suta’, saikulay tu pitakud maemin tu malabung i lalinik nu suta’ inayi’ tu a ma’alaw! sakalima tu a demiad, masadak tu ci ina minengneng tu kakalayan, deng manengnengay samiyamiyat sanay i kakalayan ci linamay atu ci Itung tusa ku bu’is.

malalitin tu ihekalay atu zumaay a natinengan

u kungku nu Pangcah