Midayhiw tu Syifu ci Cayinwen Cungtung miuyamali tu Incumin a cudad

makayzaay i Wikipitiya
跳至導覽 跳至搜尋

Midayhiw tu Syifu ci Cayinwen Cungtung miuyamali tu Yincumin a cudad[mikawaway-kalumyiti | mikawaway tu kalumyiti sakatizeng bangu]

蔡英文官方元首肖像照

ngatu-cacay[mikawaway-kalumyiti | mikawaway tu kalumyiti sakatizeng bangu]

ayaw nu tusa bataan izau ku tusa a mihcaan ayza a demiad, i tini i hulic tu 「sanpaw」 hananay balican tu「Incumin」hantu. nipangangan tuyni, u mibakahay tu misawacuay a piawaw, katinengan u Incumin i Taywan「i tinitiniay aca a tademaw」 sananay.

u angangan nu kamu kuyni, ayza, taayawen ku awas nu mita. midayhiw kaku tu Syifu, misuayaw tu pulung nu Incumin a tademaw, patahkal tu naybalucu’ay a piuyamali. namakayza ayaw nu sepat lasubu a mihcaan, u pisamsam pisepen pisawacu sakalabades namu, midayhiw kaku tu Syifu, miuyamali i tamuwan

pulekal nu likisi sa, debungan nu tau, alawan kiya itiniay a tademaw. sakainaynayi' nu sakauzip atu aenengan malupisak tu kuheni, mahiza tu u palabangay, nayi’ tu ku hahuhahul a mauzip.

Sakasilahci nu cacay a binacadan, hakay namakayzaay i pisawacu tu zuma a binacadan. caay pikamu tu kau mutelekay a kanatal kami asa, tabakien ku piazih tina likisi itawya, patahkalen misakamu ku tatenga'ay a likisi. Zikuz sa, u matatungusay, u Syifu kanca pisazatezateng tu itawyaay a kawaw, wini ku saputizeng aku itini ayza a demiad.

ngatu-tusa[mikawaway-kalumyiti | mikawaway tu kalumyiti sakatizeng bangu]

patatenga' kaku, katukuh ayza, i labu nu mita, izau henay ku sapihica miuyamali sananay a tademaw. wini sa, izayhan u saka pidayhiw nu maku tu Syifu miuyamali.mahica u mamahinihini ku itawyaay sananay, saca atu, u labades nu zuma a binacadan, mahinihini aca ku nikauzip nu tademaw sananay, wini ku saputizeng nu maku ayza i tini, maydih a pasasiyul mibalic tu mahiniay a nizateng.

pakayzaen aku i aludayay a kamu, kiya patahkal tu nabalucu'an aku miuyamali. Ina lala' i Taywan, ayaw nu sepat a lasubu nu mihcaan izau tu ku tademaw. tademaw itini nakapah ku nikauzip, izau ku nu teked a kamu, bunka, aluday, sakauzip.kilul sa, caay patubeli kuheni sa, ina aenengan debungan nu zuma a tademaw.

Amuhwan atu ci Cencenkung kawaw nu heni tu Pinpucu a binacadan mipacuk tu tademaw atu mialaw tu kalisiw, nu Kukung pikuwan u satabakiay a kawaw mipatay atu misawacu, kaLipunan mitesek ku pikuwan tu Incumin, katukuh nazikuzan malalais i kaHulaman mikawaw tu buyu'ay saenalen ku pikawan. sepat lasubu a mihcaan, kahacacay nu tayniay i Taywan a mikuwanay, pakayzaen i kuwang mibulibul, mialaw tu lala', tadamalawlaw ku kawaw nu Incumin. wini sa, midayhiw kaku tu Syifu miuyamali tu Incumin.

ngatu-tulu [mikawaway-kalumyiti | mikawaway tu kalumyiti sakatizeng bangu]

aluday nu laylay i niyazu' malalid ku kawaw nu Incumin, atu malalid kapah ku taneng mikuwan tu kalutuud. nika, imahini teban nu pipatizeng nu kanatal tu likec, malawpes ku nizateng nu Incumin tu kawaw, atu teked nu Incumin a pikuwan. lalay nu niyazu' sakalawpes, tungus akawaw nu binacadan caay ka pisulul. wini sa, midayhiw kaku tu Syifu miuyamali tu Incumin

izau ku cacay a cudad 「Taywan tongse」 sananay. saayaway a kamu hinisa; 「inayi’ ku likisi nu Taywan. Amuhwan ku palekalay, Cencenkung ku misanga’ay, kukung ku milekuay.」mahini ku nu layak a piazih tu nakawawan a likisi. Incumin a binacadan, ayaw nu pinapina malebut a mihcaan, itini tu a mauzip, kadubah ku bunka atu taneng, masalaylay katukuh wawa nu wawa wawa. nika, paicelang sa kami u niyam a piazih ku picudad i likisi, wini sa, midayhiw kaku tu Syifu miuyamali tu Incumin.

na izau ku kamu nu Incumin, milakec tu pikuwan nu hungti nu kaLipunan, atu 1945 a mihcaan sa, la'cus musakamu tu kamu namu han nu Syifu, masa pihaceng ku nika lawpes nu kamu. yadah tu ku malawpesay a kamu nu Pinpucu. hatiniay tu a Syifu, makayza i nu bunka a laylay nu Incumin caay kataneng ku pidiput, wini sa, midayhiw kaku tu Syifu miuyamali tu Incumin

sumamad, maliyuh ku Butud a tademaw tu kawaw nu Syifu, tu pipazeng i Butud tu kinabakah nu misadingkiay a hefyiliaw. i Butuday a tademaw mihadidi tu misawacu nu kinabakah nu misadingkiay a hefyiliaw. wini sa, midayhiw kaku tu Syifu miuyamali tu Butuday a tademaw

ngatu-sepat[mikawaway-kalumyiti | mikawaway tu kalumyiti sakatizeng bangu]

yudebungan nu tauku Taywan sa , maluay aayaw kusa'tipay a Pinpucu abinacadan masamsam. palawpesan nu tayniay mikuwan ku Pinpucu a tademaw, wini sa, a midayhiw kaku tu Syifu, miuyamali tu Pinpucu.

yu mabalic tu ku sakibinacadan a kawaw, napatubeli ku kanatal tu pilunguc nu Incumin. paluayaw tu ku Syifu patubeli, namisaicelang tu tu kawaw. imahini, izau tu ku kapahay 《angangan nu hulic nu Incumin》, nika, inahulic, caay kaimata nu Syifu. caay kakalamkam ku kawaw niyam, caay kahamin, caay kataneng. wini sa, midayhiw kaku tu Syifu, miuyamali tu Incumin.

sikamu ku Taywan 「yadahay kasasizuma nu bunka」 a binacadan. nika, katukuh ayza, payni i sakatanektek nu uzip nu Incumin, pasubana', sakauzip a kalisiw, atu pilihiza tu cence a kawaw, caay kahiza u nu layak. atu wiza henay tawyaay ku nipiazih tu Incumin, uzuma misawacu henay, caay henay kalawpes. caay kataneng ku kawaw nu Syifu tu saki Incumin, caay henay pilakec ku zumaay a binacadan tu malitemuhay nu Incumin a kawaw, atu malitemuhay a labades atu ngelu’. wini sa, midayhiw kaku tu Syifu, miuyamali tu Incumin.

pasakamuen aku tu sitanengay a kamu nu Incumin, ayzaay a saupu. kamu nu Tayalu,「tatenga'ay」, Balay han nuheni. u「masasulul」Sbalay han, cunusen i nuayawan nu Balay ku S a ngiha'. tatenga'ay atu masasunga’ay u malecaday i nizateng. zuma satu sa, tatenga'ay a masasulul, payni i tatenga'ay nabalucu'an misuayaw a dada', itawya taneng malaheci ku kawaw.

caay kataneng ku pisaicelang niyam, nanu sumamad katukuh ayza, caay kakalamkam a katinengan caay kataneng ku pisaicelang niyam, sisa u ngelu' namu, katukuh imahini. tatenga' hicaen naca haw.

ngatu-lima[mikawaway-kalumyiti | mikawaway tu kalumyiti sakatizeng bangu]

08.01 總統代表政府向原住民族道歉 (28611688541).jpg

ayzaay a piuyamali, anu matenetenes ku nikautang, nika u piteka kuyni. caay pizateng kaku sepat lasubuay tu a mihcaan ku labades nu Incumin, wini a nicudadan tu sasakamuen aku, piuyamali hakay caay pakalupay tu balucu namu. nika mihalhal kaku, ayzaay piuyamali, lalabu nu kanatal a tademaw ita mitekaay pasayza i kasasusulul.

wini ku nihalhalan nu maku a saupu, u nu Syifu atu Incumia a Sbalay. u ngangaw i sumamad, tatenga'ay a kawaw i sumamad, hamin han nu maku patahkal musakamu. anu sawni, Incamin a salikaka, a pasakamu tu nabalucu'an. matalaw kaku milunguc tu pisulul namu ayza, nika, milunguc kaku tu pihalhal nu binawlan, caay tu piliyaw ku nu samamaday ngangaw, wini a kanatal, hakay anu yaan tu a demiad, tanengay a masasulul.

i lalabu nu bunka nu Incumin, anu misala'cus tu niyazu'ay ku cacay a tademaw, maydih masasulul sa, pasaupuen nu kalas kuheni, masasuayaw caay pikasenun miuyamali, papipatahkalen henay tu i balucu’ay. mahamin pasakamu sa, papienipen nu kalas tu epah, itawyaay ku itawyaay satu. (masasulul)Sbalay han kuyni.

mitekaay tu ayza a demiad, a masasunga’ay hakiya, caay kai Incumin atu Pinpucu abinacadan, u Syifu ku sikawaway. matineng kaku, tanulaway sa miuyamali caay katatungus, mikawawan i Incumin, itini a katinengan ku nu kanatal a tatengay taneng masasulul asa.

itini kaku patahkal tu kamu, a patizeng ku Cungtungfu tu 「Incumicu mutelekay likisi atu masasiyul mutelekay sakakapah a Wyiyinhuyi. 」a u kaku u kakelidan nu kanatal, ku pasaupuay, atu dayhiw nu paybinacada mikilim tu tatenga’ay likisi, a pasepadacen ku katatengil tu kakawawen nu kanatal anu ayaw

ngatu-enem[mikawaway-kalumyiti | mikawaway tu kalumyiti sakatizeng bangu]

paicelang kaku misakamu, Cungtungfu a Wiyinhuyi, takalawen ku piazih, u kanatal atu Incumin malecaday masepadacay. sakaizau nu paybinacadan a dayhiw, atu Pinpucu, a u binacadan atu niyazu'ay a piazih ku maluangangan nu kawaw. wini a kawaw, a u kalacacay nu piketun nu Incumin tu kawaw, kapah a patahkal ku binacadan tu tatenga’ay a nabalucu'an.

ayzaay a hulic atu laylay nu bunka nu Incumin, yadah ku caay kalecad, patizeng kami tu izauay ku bunka a 「pipadangan tu hilic nu Incumin」, pakayzaen i hulic, milupay tu bunka nu Incumin atu lalabu nu hulic nu kanatal, yadah ku masasuadaay.

milunguc kami tu situngusay tu kawaw, kalamkamen milusimet, zayhan lalay a kawaw nu Incumin, i lalabu nu kauzipan a lala', caay kau idih pacakay, miadup caay ku mamalawpesay a aadupen ku niadupan, u mamalubu atu malubuay tu. mahiniay kawaw, masasakamu kita a hicaen mihulak.

uzuma sa tu, a milunguc kaku tu Sincenyin a pasaupu「micuzuhay tu Incumin angangan nu hulic a saupu.」u kalacacay nu sasakamuen nu Wiyanhuyi , anu ayaw u Syifu, a palacacay mikawaw tu kawaw. kawaw namin sa mikilim tu mazatengay likisi, micuzuh tu Incumin cece, malecad ku kasikalisiw, sapasubana’ atu palaylay tu bunka, atu sakatanektek tu uzip, sakakapah nu i tuseay a binacadan.

milunguc kaku tu situngusay tu kawaw, pipazen tu kinabakah nu misadinkiay tu hefyiliaw i Butud mahicaay ku piketun tu kawaw, patahkalen cimaay kuyza. ayaw nu pilimad tu kinabakah nu misadinkiay tu hefyiliaw, pabelien tu ku Yamiay a tademaw tu kalisiw.

atu kasikazen tu ku Pinpucu a binacadan tu pisakaku nuheni, Incumin kaku sananay, kami i ayaw nu siwa a bulad tulu bataan a demiad, a matatengil tu mahicaay a hulic, saka kapah nu Pinpucu a tanengay ku nuheni miteked.

ngatu-pitu[mikawaway-kalumyiti | mikawaway tu kalumyiti sakatizeng bangu]

ayza a mihca cacay bataan izau ku cacay a bulad cacay a demiad, miteka kami tu kawaw, patahkal tu nu Incumin a sakauzip a lala'.pakahulican tu ku saupu nu niyazu', malaheci tu masaungay niyam, anu ayaw, nabalucu’an nu Incumin a misateked, a hacacay asa malaheci. sakalamkamen niyam, kasimataan nu Incumin a《pisateked nu Incumin a hulic》,《nu lala’ay atu bayuay nu Incumi a hulic》、《sapalekal tu kamu nu Incumin a hulic》a kawaw, patayzaen i Lifayin papiazih.

ayza namalahuk, a masaupu kami tu pakayzaay i nu Incumin a kaygi. labu nu kaygi, pasakamu tu yadahay a kawaw nu Syifu. paymihca waluay bulad cacay demiad, pasakamuen nu Syifu ku pulung nu Incumin tu nikawawan tu binacadan likisi atu misumad tu la’cusay palakapah a nakawawan. milahci mikawaw tu tatenga’ay a likisi, patizeng tu angangan nu piteked nu Incumin, u Syifu Incumin tuluay a sasuayawen a kawaw

mikukay kaku tu pulung nu Incamin a salikaka, kamu ku pacekilay tina kanatal a tademaw, nipasazipa'an a lala', atu sumamaday a laylay, inayi' ku pakademecay. u mahiniay, kuna pabelien tu kakasikazan, tungusay u aca.

zikuz tu, pakayzaen niyam i picuzuh tu kawaw, teluc nu binacadan, laylay nu wawa wawa, atu Tawan a tadmaw amin nu binacadan, caay tu kalawpes ku kamu, caay tu kapawan, mangaleb a caay tu piliyas tu lalangawan nu uzip, caay tu kapilakalak i nu uzipan a lala'.

mitakus kaku ayza tu itiniay, i tilibiay atu wangluay Incumin a salikaka, mapulung pawacay. mitakus kaku titaan mikuking, caay ku pihusiw. miadasay tamuwanan paicelang mitudawa, pasubana', palahci tu nakamuan nu Syifu, hay masalub ku tawyaay a ngangaw

milunguc kaku tu pulung nu tademaw ita misaicelang, matineng tu likisi ita, matineng tu aenengan a lala' ita, a matineng tu kasasizuma nu binacadan a lalangawan. pasayza i masasunga'ay ay ku culil, pasayza i sikapulung asa mauzip, pasayza i misabaluhay ku nikauzip a Taywan.

milunguc kaku tu binawlan nu kanatal, ayza a demiad, misaicelang kita misakapah tu kanatal ita, tatenga'ay u malacacayay ku kasasizuma nu binacadan.

salikaka mapulung kukay 

namakayniay a nasulitan nasakamuan atu natinengan[mikawaway-kalumyiti | mikawaway tu kalumyiti sakatizeng bangu]

nasulitan nay pabalucu'ay a kawaw nu subana'ay a pu 2018-1